شي نهار.... بقلم: زينة شعاع

شي نهار....

شي نْهار لمّا من الغَفا تُوعا

وتَعمِل عَ هالقلْب الحِلو سَكرَة،

بِتْزَلْغِط النّحلات عالزّهْرَة

ويْشَرشْرُوا الْعَسْلات مِن كُوعا...

مِن غَفوْتَك شو تِعبِت النّطرَة!

وصَمت الوَقت عَم يِشحَد رجُوعا!

شي نْهار لمّا من الغَفا تُوعا... 

وشي نْهار لمّا من الجَفا تُوعا

بِيْجِنّ حَرفي وتُرقُص الكِلمات،

وتِنسى غْرُوبا الشمس وِطْلُوعا

ويْصير شَعري يْسابِق النّسمات

بْ نَفحات مِن عُمري أنا بِالذّات

وتُضوي لَيالي الحُب وشْمُوعا!

شي نْهار لمّا من الجَفا تُوعا...

زينة شعاع 🌷💕🌹