حكاية...بقلم الشاعر:سمير مقداد
رح احكيلكون
حكاية
حكاية من سنين
في صدري
مخباية
الحب و الفرحة
بداية
الآهات و الدمعة
نهاية
حكاية شب
و صبية
قتلت أحلامهون
رصاصة طايشة
غبية
الشب صار متطرف
و الصبية صارت
سبية
كانت القلوب
في احضان الوفا
مرتمية
كانت الحياة بريحة
المسك ، الفل
و المريمية
و يا خسارة افترقوا
بمؤامرة
كونية
لك يحرق حريشو
الكلاشينكوف
حرق جناين حب
و زرع في قلوبنا
الخوف
خلانا بعد الأمان
الحقد بعيون الناس
نشوف
شو كانت ع جبين
الاحباب تنطبع
قبلة
دارت الايام
كترت الأعلام
و بفتنة الإعلام
صارت القبلة
قنبلة
كنا السلام للدنيا
نبيع
شعارنا الدين لله
والوطن
للجميع
وضحكات صبايا حارتنا
متل زهر
الربيع
امتا امتا نرجعلك
يا وطن
و يطلع كل غريب
فيكي استوطن
وطني يا احلى جنة
و مغنى
عانقتي بحنانك
محمد ، علي
و حنا
يجي يوم نضمك
نشمك متل ياسمينة
و ينزاح كل هم
عنا
سمير مقداد
تعليقات
إرسال تعليق